كيف تشتغل حاسبة تقسيم الراتب؟
تدخل ثلاث معلومات: صافي الراتب اللي ينزل في حسابك، القاعدة اللي تبيها، واحتياجاتك الشهرية: الإيجار والأقساط والفواتير، ومعها الأساسيات مثل المقاضي والبنزين. الحاسبة تطلع لك ثلاث مبالغ، وتقارن احتياجاتك بحصة الاحتياجات، وتقترح عليك القاعدة الأنسب لأرقامك.
في هالحاسبة الرقم الأول في كل قاعدة للاحتياجات والالتزامات، الثاني للرغبات، والثالث للادخار:
| القاعدة | احتياجات والتزامات | رغبات | ادخار | تناسب مين؟ |
|---|---|---|---|---|
| 50/30/20 | 50٪ | 30٪ | 20٪ | التزامات خفيفة |
| 60/20/20 | 60٪ | 20٪ | 20٪ | إيجار أو أقساط متوسطة |
| 70/20/10 | 70٪ | 20٪ | 10٪ | التزامات عالية أو راتب محدود |
وش قاعدة 50 30 20؟
قاعدة 50/30/20 تقسم الدخل بعد الاستقطاعات: 50٪ للاحتياجات، 30٪ للرغبات، 20٪ للادخار وسداد الديون الإضافي. اشتهرت من كتاب All Your Worth لإليزابيث وارن وابنتها أميليا وارن تياجي سنة 2005.
- الاحتياجات: السكن، الفواتير، المقاضي، المواصلات، والحد الأدنى من الأقساط.
- الرغبات: المطاعم، الطلعات، الاشتراكات الترفيهية، التسوق غير الضروري.
- الادخار: صندوق الطوارئ، الأهداف، والسداد المبكر.
احسبها دايماً على الصافي، يعني بعد استقطاعات مثل التأمينات الاجتماعية للموظف السعودي. شرح أوسع لمدى مناسبتها هنا في قاعدة 50/30/20 وهل تنفع في السعودية.
كم يطلع كل جزء على رواتب مختلفة؟
هذي مبالغ قاعدة 50/30/20 على رواتب شائعة (أمثلة بالريال):
| صافي الراتب | احتياجات 50٪ | رغبات 30٪ | ادخار 20٪ |
|---|---|---|---|
| 4,000 | 2,000 | 1,200 | 800 |
| 6,000 | 3,000 | 1,800 | 1,200 |
| 8,000 | 4,000 | 2,400 | 1,600 |
| 10,000 | 5,000 | 3,000 | 2,000 |
| 15,000 | 7,500 | 4,500 | 3,000 |
لاحظ إن حصة الاحتياجات لراتب 4,000 هي 2,000 ريال بس، ولو إيجارك لحاله يقرب منها، ما يبقى شي يذكر للمقاضي والفواتير. عشان كذا القاعدة نقطة بداية، مو قانون.
وش معنى التنبيه لما تكون احتياجاتي أكبر من حصة الاحتياجات؟
التنبيه يطلع لما مجموع احتياجاتك (الالتزامات الثابتة مع المقاضي والبنزين) يتجاوز خانة الاحتياجات في القاعدة اللي اخترتها. ساعتها اختر القاعدة اللي تقترحها الحاسبة، أو خفف التزاماتك.
مثال: صافي راتبك 6,000 ريال، والتزاماتك (إيجار 2,000 + قسط سيارة 1,000 + فواتير 400) = 3,400 ريال، ومعها مقاضي وبنزين 800 ريال، يعني احتياجاتك 4,200 ريال = 70٪ من الراتب.
في 50/30/20 حصة الاحتياجات 3,000، يعني احتياجاتك أكبر منها بـ1,200 ريال، والتنبيه يطلع.
ولأن احتياجاتك فوق 60٪، الحاسبة تقترح 70/20/10: احتياجات 4,200 تغطيها بالضبط، ورغبات 1,200، وادخار 600. تقسيم واقعي لين تخف الأقساط.
أي قاعدة أختار؟ قرار سريع حسب احتياجاتك
اختر القاعدة حسب نسبة احتياجاتك (الالتزامات الثابتة مع الأساسيات) من صافي الراتب، مو حسب اللي تتمناه. القاعدة الصح هي اللي تقدر تمشي عليها ثلاث شهور ورا بعض:
| احتياجاتك من الراتب | القاعدة المقترحة | ليش؟ |
|---|---|---|
| 50٪ أو أقل | 50/30/20 | احتياجاتك داخل حصتها، والباقي يكفي للرغبات وادخار قوي. |
| أكثر من 50٪ إلى 60٪ | 60/20/20 | توسّع الاحتياجات وتحافظ على 20٪ ادخار. |
| أكثر من 60٪ | 70/20/10 | واقعية لين تخف الأقساط، والادخار ما يوقف. |
هذي قاعدة هَوْن التقريبية، ونفسها المستخدمة في كل أدلتنا، مو قاعدة رسمية. والأهم إنك ما تترك الادخار صفر حتى في أصعب شهر، ولو كان 5٪ بس، لأن العادة أهم من المبلغ في البداية. ولما يخلص قسط كبير، رجّع الفرق للادخار بدل ما يذوب في المصاريف.
نصايح لاستخدام التقسيم صح
- ابدأ بالقاعدة اللي تمشي مع وضعك الحالي، وانتقل لـ50/30/20 لما يخلص قسط كبير.
- حوّل مبلغ الادخار أول ما ينزل الراتب، لا تنتظر آخر الشهر، لأن اللي يبقى آخر الشهر غالباً قليل أو صفر.
- لو جاك دخل إضافي مثل مكافأة، لا تدخله في نفس التقسيم تلقائياً. قرر نصيب الادخار منه أول.
- احسب التزاماتك بدقة أول في حاسبة الالتزامات الشهرية.
- قسّم خانة الرغبات والأساسيات على أيام الشهر عشان تعرف سقفك اليومي، أو خلّ تطبيق مثل هَوْن يسويها لك كل صباح.
أسئلة شائعة
كيف أقسم راتبي بقاعدة 50 30 20؟
اضرب صافي راتبك في 0.5 للاحتياجات، و0.3 للرغبات، و0.2 للادخار. راتب 10,000 ريال مثلاً يصير 5,000 و3,000 و2,000. أمثلة أكثر في كيف أقسم راتبي الشهري.
هل أحسب التقسيم على الراتب الإجمالي أو الصافي؟
على الصافي، لأن القاعدة في أصلها مبنية على الدخل بعد الاستقطاعات، وهو المبلغ اللي تقدر تصرف منه فعلاً.
وش الفرق بين 50/30/20 و70/20/10؟
في 70/20/10 حصة الاحتياجات والالتزامات أكبر (70٪) والادخار أقل (10٪). تناسب اللي التزاماته عالية أو راتبه محدود، و50/30/20 تناسب اللي التزاماته خفيفة.
احتياجاتي أكبر من 50٪ من راتبي، أي قاعدة أختار؟
لو احتياجاتك من 50 إلى 60٪ استخدم 60/20/20، ولو فوق 60٪ استخدم 70/20/10، والحاسبة تقترحها لك تلقائياً. وحط هدف تنزّل فيه التزاماتك مع الوقت.
الأقساط تدخل في الاحتياجات ولا الرغبات؟
الأقساط الثابتة تدخل في خانة الاحتياجات والالتزامات، لأنك ملزم تدفعها. أما أي سداد إضافي فوق القسط فيدخل في خانة الادخار.
محتوى تعليمي عام لمساعدتك تنظّم مصروفك، وما يُعد استشارة مالية أو شرعية أو قانونية. الأرقام في الأمثلة توضيحية، وقراراتك المالية ترجع لك.